Kitengo cha Building a Caring Community, BCC kilichopo chini ya KKKT Dayosisi ya Kaskazini kimeadhimisha siku ya kilele cha mwezi wa afya kwa kuwafanyia vipimo Watoto wenye ulemavu wa viungo na kufanya ibada maalumu.
Tukio hilo limefanyika tarehe 29 Septemba 2026, KKKT Usharika wa Rau, uliopo Moshi, Kilimanjaro, ambapo Watoto wanaolelewa na vituo mbalimbali vya BCC wamefanyiwa vipimo vya kitabibu ili kujua maendeleo yao.
Mgeni rasmi wa tukio hilo ambae ni Msaidizi wa Askofu wa KKKT Dayosisi ya Kaskazini, Mch.Deogratius Msanya ametoa pongezi kwa wazazi kwa kuchukua uamuzi mzuri wa kuwaleta watoto wao kupata msaada katika vituo vya BCC.
Mch. Msanya ametoa wito kwa watoa huduma, kuwahudumia kwa upendo watoto hao, kwani kazi hiyo ni huduma yenye baraka na inayohitaji kutozimia moyo.
Naye Sabina Manoi ambae ni mmoja wa wazazi wa watoto walionufaika na huduma za BCC ameishukuru BCC kwa kuwahudumia Watoto wenye ulemavu hasa kwenye masuala ya kiafya, kwani watoto wengi wamekatiwa bima za afya.
Katika tukio hilo, serikali imewakilishwa na Dunkan Mgati, Afisa Mkuu wa Ustawi wa Jamii kutoka Manispaa ya Moshi, ambae ameeleza historia ndefu na mchango wa BCC katika Ustawi wa Jamii, huku akieleza namna taasisi hiyo imekua msaada kwa wanawake wenye watoto wenye ulemavu. Sambamba na upimaji wa watoto BCC wametoa huduma ya vipimo mbalimbali vya afya kwa wazazi na wageni waliofika katika tukio hilo.
Katika Ibada ya Rejoyce Spirit Mchungaji Kileo ametoa neno huku akisema Yesu Kristo anafundisha kwamba watoto ni wa thamani mbele za Mungu, licha ya kuwa na changamoto mbalimbali, huku akiwatia moyo wazazi kwamba watoto hao ni wa thamani.
Mratibu wa BCC, Mdiakonia Elirehema Kaaya, alisema huduma hiyo inalenga kuhamasisha ujumuishi na kutoa elimu kwa jamii kuhusu namna ya kuwajumuisha vijana wenye mahitaji maalumu katika jamii. Kwa upande wake, mzazi mmoja kwa niaba ya wazazi wengine alitoa shukrani kwa BCC kwa kuwahudumia watoto hao katika nyanja mbalimbali.