Mratibu wa Kitengo cha Elimu ya Theolojia Enezi (ETE) cha KKKT Dayosisi ya Kaskazini, kilicho chini ya Idara ya Elimu ya Kikristo, Mtheolojia CPA Bosco Nkya, amesisitiza umuhimu wa kuwaandaa walimu wa Neno la Mungu kwa kuwajengea maarifa sahihi yatakayowawezesha kutekeleza wajibu wao kwa ufanisi.
Akizungumzia umuhimu wa maarifa katika huduma ya kufundisha Neno la Mungu, Mtheolojia Nkya amesema kuwa bidii pekee haitoshi bila kuwa na maarifa sahihi, akisisitiza kuwa bidii bila maarifa ni bure.
Ameyasema hayo Oktoba 13, 2026, wakati wa kuendelea kwa semina za Elimu ya Theolojia Enezi (ETE), zilizofanyika katika ofisi za Jimbo la Kilimanjaro Kati na kuwashirikisha wachungaji, wainjilisti pamoja na waratibu mbalimbali wa Dawati la Elimu ya Kikristo kutoka sharikani katika jimbo hilo.
Semina hiyo inalenga kuwaandaa na kuwaimarisha wawezeshaji wa Elimu ya Theolojia kwa Wakristo wenye moyo wa kumtumikia Mungu, ili waweze kueneza Injili katika maeneo mbalimbali na kuwawezesha wengine kujifunza Neno la Mungu kwa usahihi.
Baadhi ya wajumbe walioshiriki semina hiyo wameeleza kufurahishwa na mafundisho waliyopokea, wakisema kuwa yamewakumbusha wajibu wao wa kuwaandaa wengine kwa ajili ya huduma ya Mungu.
## Ibada zahimizwa kufanyika kwa uzuri na utaratibu
Katika semina hiyo, Mratibu wa Liturujia, Ibada na Uimbaji wa KKKT Dayosisi ya Kaskazini, Mchungaji Awumsuri Masuki, amesisitiza umuhimu wa kuendesha ibada kwa uzuri na utaratibu, akieleza kuwa wakati mwingine watu huzingatia zaidi uzuri wa ibada na kusahau umuhimu wa kufuata utaratibu unaotakiwa.
Mchungaji Masuki ameyasema hayo Oktoba 13, 2026, wakati wa semina ya Elimu ya Theolojia Enezi (ETE) iliyowakutanisha wachungaji na wainjilisti wa Jimbo la Kilimanjaro Kati.
Akisisitiza umuhimu wa kufuata utaratibu wa ibada, maelekezo hayo yameelekeza umakini katika kuhifadhi misingi na utambulisho wa ibada za kanisa, badala ya kuzingatia uzuri wa nje pekee au kuiga kila kinachofanywa na wengine.
Baadhi ya wajumbe walioshiriki semina hiyo wameunga mkono maelekezo hayo, wakieleza kuwa ni muhimu kusimamia utaratibu wa ibada na kuthamini taratibu za kanisa lao, badala ya kuiga kila kinachofanywa na makanisa mengine.
Kwa ujumla, semina za Elimu ya Theolojia Enezi (ETE) zinaendelea kutoa fursa kwa wachungaji, wainjilisti na wawezeshaji wengine wa Neno la Mungu kuimarisha maarifa na uwezo wao katika huduma. Mafunzo hayo pia yanasisitiza umuhimu wa kufundisha Neno la Mungu kwa usahihi na kuendesha ibada kwa uzuri, utaratibu na kwa kuzingatia misingi ya kanisa.